Жүжигт тоглож үзэх юмсан гэсэн мөрөөдөл маань биелэж байгаа мэт санагдаад. Шоуны ялагч гол зорилго биш жүжигчин болох хүсэл минь биелээсэй гэдэг үүднээс мөрөөдөлдөө хөтлөгдөн оролцлоо. Ялагч болсондоо баяртай байна.
-Таван үе шаттай явагдсан . Шат ахих тусам үүрэг даалгавар хүндэрсэн нь тодорхой. Энэ талаар эргэн дурсвал?
-Эхний шатанд ерөнхий боловсролын сургуулийн сурагчийн бичсэн “Хайр гэж юу вэ” шүлгээр оролцсон. Найз бүсгүйдээ хаягдсандаа гутарч амиа хорлохыг завдаж буй залуугийн тухай юм. Хоёрдугаар шатанд этюд хийхэд хүндхэн санагдсан. Өмнө нь этюд хийх байтугай төсөөлөлгүй хүн чинь сандарна биз дээ. Мөрөөдөмтгий, бух улангасуулагч залуугийн тухай зохиолын этюд. Гуравдугаар үед Ардын уран зохиолч, Төрийн шагналт яруу найрагч Б.Лхагвасүрэнгийн “Тамгагүй төр” жүжгийн Арчуг хааны дүрийг бүтээхийг оролдсон. Уг нь, Арчуг биш Ачрын дүрийг бүтээхээр төлөвлөсөн ч Ачирт монологийн хэсэг байгаагүй юм. Гуравдугаар шатны даалгавар дотоод сэтгэлийн хүүрнэл буюу монолог байсантай холбоотой. Дөрөвдүгээр шатанд Н.Колядагийн “Рагадка“ буюу “Чавх” жүжгийн хэсгээс бүтээсэн. 33 настай залуу, 18 настай хүү хоёрын тухай жүжиг. Шилжилтийн насандаа хүүхдүүд алдах тохиолдол элбэг байдаг. Түүнээс сэрэмжлүүлэх, ойлгуулахыг хичээж оролцсон. Хамгийн сүүлийн шатны даалгаврыг цаанаас өгсөн. У.Шекспирийн “Ромьёо, Жульета” жүжгийн хэсгээс эрэгтэйчүүд нь гурван хүний аль нэгнээс , охидууд нь Жульета, өрлөг эх хоёрын хэн нэгний дүрийн хэсгээс бүтээх даалгавар авсан. Би гуравдугаар бүлгийн нэгдүгээр үзэгдлийн Веро хотын гудамжинд Рекузагийн үхдэг хэсгээс сонгосон. Шат бүхэн хүнд байлаа. Нэгдүгээр шат арай гайгүй юм уу даа. Дөрөвдүгээр үед өөрийгөө эвдэхийг оролдсон. Өмнө нь шаналсан хүний байдлыг гаргасан бол дөрөвдүгээр үед 18 настай хүүгийн дүрд орж чадах уу , үгүй юу гээд л зүтгэсэн. Тавдугаар шатанд мэргэжлийн таван жүжигчин шаардлагатай болсон. Хамгийн сүүлийн шат учраас өндөр хариуцлага тулгарсны зэрэгцээ мэргэжлийн жүжигчид маань зав боломж хомс байлаа. Сэтгэл хөдөлгөж, догдлуулсан мөч. Ямар ч гэсэн амжилттай давлаа. Амжилт гаргахад гүн туслалцаа үзүүлсэн, дэмжсэн, хамтарч ажилласан хүмүүст талархал илэрхийлж байна. Суудлын вагон депогийн захиргаа, хамт олон, Үйлдвэрчний эвлэлийн хороон дарга, “Хувьсал” продакшин, ТЗДС-ийнхандаа, “UBS” телевизийнхэнд “баярлалаа” гэж хэлье.
- Үе шат бүхэнд мэргэжлийнхэнтэй хамтрах, дэмжлэг авах боломжгүй байсан учраас өөртөө найдахаас гарцгүй болжээ?
- Бусдын дэмжлэг авалгүй яахав. “Хувьсал” продакшны найруулагч, Дорждэрэм, “Чингис СООСЭ” сургуулийн багш Оюунсүрэн , Тайзны хөдөлгөөний багш Батбаатар нар тусалсан. Мэдээж өөртөө бас итгэх ёстой.
-Сүүлийн 16-д шалгарч үлдэхэд өөртөө улам бүр итгэж эхэлсэн биз. Тавдугаар шат сүүлийнх учраас догдолсон л байх?
-Тавдугаар шатанд улам их хичээсэн. Сүүлийн даваа учраас ингэхээс аргагүй. Ялагчыг шалгаруулах мөчид их догдолсон, сэтгэл хөдөлсөн. Шагнал гардуулах үед бүр их сандарч бараг яасан гэдгээ мэдээгүй. Хожим, дэргэд зогсож байсан хүүхэд “Та сандраад өвдөг чинь чичирч байсан” гэж хэлсэн. Реалити шоуны ялагч болохгүй ч гэсэн шагнал авах нь тодорхой байсан учраас горьдлоготой байлаа. Ялагч болсныхоо маргааш хүртэл өөртөө бүрэн итгэхгүй жингүйдсэн юм шиг л байсан.
-Тэмцээний шалгаруулалтын явцад шүүгчид танд урмын үг хэлж, ташуур өгч байсан шүү дээ?
-Шүүгчид урмын үг хэлж, хурцалж байлаа. Би их баярладаг юм. Хоёрдугаар шатанд Төрийн шагналт жүжигчин Д.Сосорбарам гуай үндсэндээ намайг авч үлдсэн. Төрийн соёрхолт хоёр жүжигчинд үнсүүлснээр би энэ тэмцээнд түрүүлэх адис авсан болов уу. Тэдний үнсэлтийг би хэзээ ч мартахгүй. Өөртөө шаардлага, өндөр хариуцлага тулгарч буйг мэдэрсэн.
-Реалити шоунд оролцохоос өмнө хийгээд ялагч болсны дараа үеийг харьцуулахад хоёр өөр ертөнц төсөөлөгдөнө. Бодоход сонин байх. Олон танилтай, дэмжигчтэй болсон гээд?
-Тийм. Реалити шоунд оролцох явцад зөвхөн өөрийгөө сориод явсан. Тэмцээний ялагч болсноор асар их үүрэг хариуцлага ирж байна. Бусдын итгэлийг даах ёстой. БНСУ-д суралцаж, соёл урлагийг нь судлаад Монголдоо соёлын үр тарилцана гэж боддог.
-Шоуны ялагч олон шагналын эзэн болсон нь тодорхой. Заримаас нь дурьдахгүй юу?
-БНСУ-ын “ World korea” групп тус оронд урлагийн их сургуульд дөрвөн жил үнэ төлбөргүй суралцах эрхээр шагнасан. Англид аялж У.Шекспирийн театрт сонгодог жүжиг үзнэ. “Neхt” электроникс дэлгүүрийнхэн нэг сая төгрөгийн электрон бараа авах эрх олголоо. Энэ мэтээр шагналууд бий.
- Мөрөөдөлдөө хүрэх гэрэлтэй зам шинээр дахин нээгдсэн. Цаашид шантрахгүй байх л үлдлээ?
-Хүмүүсийн надад хүлээлгэсэн итгэл найдварыг өвөрлөж гадаадад суралцаад ирэхдээ эх орондоо, Монголынхоо урлагт хэрэгтэй зүйл хийнэ, бүтээнэ . Энэ бүхнийг хийх ёстой.
-Реалити шоу ч өвөрмөц онцлогтой болсон?
-Энэ шоуг зохион байгуулснаар хүмүүс жүжиг үзэх, ном унших дуртай болж байгаа гэж ойлгодог. Театрын онцлогийг тодорхойлж бас хөгжлийнх нь нэгэн үеийн үрийг тарилцсанаар энэ шоу бусад реалити шоунаас ялгаатай. Бусад реалити шоу дуу эсвэл загварын гэх байдлаар явдаг шүү дээ. Энэ удаагийн реалити шоуны нийгмийн өгөөж их гэж боддог.
-Шоунд оролцохын тулд уншиж судлах шаардлага тулгарсан нь тодорхой байсан гэдгийг ярианаас тань ойлголоо?
-Уншиж судлахгүйгээр урагшаа ахихгүй. Тухайн жүжгийн дүрийн хэсгээс бүтээхийн тулд судалж, уншиж дүрийнхээ мөн чанарыг ойлгох ёстой. Энэ хэсгээс бүтээнэ гээд бага унших боломжгүй. Уг жүжгийг эхнээс нь дуустал нэгээс хоёр гурван удаа дахин давтан уншиж байж дүр бүтээдэг. Эргэцүүлж бодох, мэргэжлийн хүмүүстэй ярилцаж, зөвлөлдөж , задаргаа хийх шаардлагатайг сайн ойлгосон.
-Мөрөөдөл биелэхэд нэг алхам урагшиллаа. Ийм шоу болоосой гэж хүсдэг байв уу?
- Хүсэл биелэх шиг болсон. Театрчилсан реалити шоу болох сургаар оролцвол яах бол гэсэн эргэлзээ төрж байлаа. Ийм шоу болсонд баяртай байна.
-Хэдэн онд дээд сургууль төгсөв. Ямар мэргэжилтэй билээ?
-- ТЗДС-ийг 2006 онд вагоны техникч, дараа нь инженерээр төгсөөд мэргэжлээрээ зургаа дахь жилдээ ажиллаж байгаа. Төмөр замчдын ам бүлд багтсандаа баяртай байдаг. Төмөр замын мэргэжил хүний амь нас хариуцсан өндөр, хариуцлага тулгардаг онцлогтой. Би галт тэргээ дагаж аялалд явдаг. Ажил маань онцлогтой учраас халуунд халлаа, хүйтэнд даарлаа гэж халширахгүй давахыг хичээдэг. Үнэхээр сайхан мэргэжил.
-Таныг удам дагаж төмөр замчин болсон болов уу гэж төсөөлж байна?
- Үгүй. Аав маань цэргийн байгууллагад ажиллаж байгаад тэтгэвэртээ гарсан. Би сонирхолоо дагаж ТЗДС-д орсон. Ирээдүйтэй гэж сонгосондоо алдаагүй. Гэр бүлийн хүн маань эмч мэргэжилтэй. Төмөр замын Төв эмнэлэгт ажиллаж байсан. Одоо гэр зуураа байна.
-Реалити шоунд оролцогсдын хамгийн ойрын дэмжигч , шүүмжлэгч бас зөвлөгч нь ойр дотны хүмүүс гэр бүлийнхэн нь байдаг?
-Таны хэлдэг үнэн. Реалити шоунд орох уу, яах уу гэдгийг ээжээсээ асууж зөвлөлдсөн. Ээж маань дэмжсэн учраас зориг шулуудсан даа. Ээж, аав хоёр минь миний улаан фен. Реалити шоу хэзээ гарах вэ гэж асууж сураглана, догдолж, хүлээнэ. Зурагтын өмнөөс бараг салахгүй. Эхнэр маань их дэмжинэ. Ийм хувцас өмс, тэгвэл, ингэвэл дээр юм уу гэж зөвлөнө. Зарим үед намайг шантарч, сэтгэлээр унахад болно, бүтнэ гэж тайвшруулна урам хайрлана. Ялагч болоход тэдний маань дэмжлэг ч орсон нь тодорхой. Гэр бүлийнхэндээ баярлалаа, хайртай шүү гэж хэлье.
-Төмөр замын ажил цаг зав багатай. Шоунд оролцох үедээ хэрхэн зохицуулж байв?
-Би арван дөрөв хоног аялалд явж, ирээд арван дөрөв хоног амардаг. Миний аз болоход реалити шоу маань намайг аялалд явахаас өмнө эсвэл ирсний дараа голцуу болж таардаг байлаа. Харин бэлтгэл хийхэд цаг зав жаахан хомс байсан. Нэгээс хоёр удаа л аялалд гарах өдөр шоунд оролцож таарсан.
-Гадаадад урлагийн сургуульд суралцана. Хос мэргэжилтэй болж таарах нь. Цаашид сургууль төгсч ирээд гэсэн төсөөлөл бий юу?
-Одоохондоо тэгнэ, ингэнэ гэсэн төсөөлж, төлөвлөсөн зүйл алга. Ямарч гэсэн БНСУ-д суралцахаар очихдоо эх орныхоо нэрийг өргөж явна. Эх орондоо ирээд сурч мэдсэнээ бусадтайгаа хуваалцана.
-Зурагтаар реалити шоу гарахад өөрийгөө хэрхэн оролцож буйг хараад үнэлэлт, дүгнэлт хийх үе байсан болов уу?
-Анх оролцоод сандарч эхний шатанд шүлгийн хэсгээс зарим үгийг хэлээгүй үлдээсэн, мартсан байсан. Оролцогч бүхэнд үгээ мартах, үйлдлээ дутуу хийх зэрэг тохиолдол байлаа. Хөгжилтэй явдал биш л дээ. Зурагтаар оролцсон реалити шоу гарахад үзээд дараагийн шатанд орохдоо “би тийм хөдөлгөөн хийхээр ингэж харагдаж байсан” гээд алдаа дутагдлаа засахыг бодож оролцдог.
-Шүүгч нарын үг үнэтэй зөвлөгөө байсан нь тодорхой ?
-Тийм. Шүүгч нарын надад болоод бусад оролцогчид хэлсэн үг бүр үнэтэй зөвлөгөө болсон. Хэдийгээр надад хэлээгүй ч өөртөө тусгаж авч байсан. Яахав, зарим оролцогчийн хувьд шүүгчийн үг зэмлэл шиг сонсогдсон байхыг үгүйсгэхгүй. Гэхдээ шүүгч бол шүүгч. Оролцогч нарт алдаа дутагдлыг нь тийм байна, ийм байна, үүнийгээ засч залруул гэж хэлэх үүрэгтэй. Хэлэхээс ч аргагүй. Шатнаас шатанд шүүгч нарын үгийг бодож , улам бүр туршлагажиж байсан.
-Таныг таеквондогийн дэлхийн аваргаас мөнгөн медаль авсан гэж сонслоо. Хэдэн онд мөнгөн медаль хүртэв?
-Зургадугаар ангиасаа таеквондогоор хичээллэсэн. 2004 онд БНАСАУ-д нээлттэй тэмцээн зохиогдоход оролцож мөнгөн медаль авсан. Олон улсын хэмжээний мастер цолтой. Энэ тухай танай сонинд ярилцлага өгч байлаа.
-Зав боломж хомс, дээр нь бэлтгэл гээд шахуу оролцсон байх. Их ядрав уу?
-Ядарсан байна. Ядарснаа реалити шоу дууссны дараа мэдлээ. Суухаар унтчих гээд үүрэглээд л. Гэхдээ том даваа, сорилтын ард амжилттай гарсандаа баяртай байгаа.
-Удахгүй шинэ он гарна. Таны хувьд ирэх жил гэрэл гэгээтэйгээр төсөөлөгдөж буйд эргэлзэхгүй байна. Реалити шоунд оролцсоноор кино, жүжигт тоглуулах урилга, заллага их ирэв үү?
- 2012 онд хийх ажил, уран бүтээл их байх болов уу. Реалити шоуг зохион байгуулсан “UBS” телевизийнхэн сүүлийн шалгаруулалтад үлдсэн 16 хүнийг оролцуулсан жүжиг хийхээр болсон. Д.Сосорбарам гуай жүжиг тавина, албан ёсоор оролцоорой гэж таван оролцогчид урилга өгсөн. Ажлын зэрэгцээ ачаалалтай ажиллах болов уу. 2012 оныг амжилт бүтээлээр угтаж буйдаа баяртай байна.